今日下晝澳職獨腳戲，FC麥克阿瑟主場迎戰中岸水手。FC麥克阿瑟雖然排名較高，但今季主場表現差過客場，中岸水手攻力疲弱，今仗必定防守行先，唔慌多波入，寧捧3.5球入球細。（無綫myTV SUPER周一下午4時直播）文:法達斯維

FC麥克阿瑟現居中游，老將謝明同另一前鋒馬田積高利斯今季各入4粒，令該隊開咧後8場聯賽取得11分，睇落都唔差，但要留意喺主場只係拎到4分，4次喺自己地頭出擊，唯一贏波係大勝魚腩珀斯光輝，睇埋佢哋作客贏過FC悉尼同威靈頓鳳凰，主客表現反差幾大，加上近年畀中岸水手食住，之前5次碰頭3度落敗，今場會小心為上。

上季雙料盟主嚴重走樣
上季常規賽兼季後賽盟主中岸水手，因要參加亞冠精英盃，唔習慣多線作戰下，難免影響戰績同信心，佢哋唔單止喺亞冠5戰4敗，頭7輪聯賽贏得2場及只得9分。水手最大問題係前線啞火，7場聯賽入得5粒咁大把，同珀斯光輝淪為聯賽火力最弱嘅球隊，非常肉酸，好彩佢哋防守都尚算OK，呢7場有6次開3球或以下，惟有打守勢波，3.5球細盤值得捧場。