砂岩主場輸到慌 三箭搶韁半W有計

今晚日職獨腳戲，由鳥棲砂岩主場硬撼廣島三箭。砂岩近況略有起色，不過多場勝仗都係來自客場，主場表現欠佳，遇上剋星三箭難有運行，三箭有力速食對手，半場客勝有計。（無綫myTV SUPER周日晚上6時直播）

砂岩各項近7場取得4勝3負，睇落唔錯，起碼比之前屢戰屢敗，確係有起色。不過大家要留意，連同日皇盃淘汰FC橫濱在內，砂岩呢4場勝仗有3場係來自客場，若果單計近5次聯賽主場，竟然4度落敗，主場演出仲衰過作客，而且經常輸大意波，難怪仲喺下游掙扎。

客軍二連勝信心提升
另邊廂，前列分子廣島三箭雖然有起伏，但查實各項賽事計，近12場取得8勝2和2負，單計近兩仗全勝共轟5粒，包括上輪憑大橋祐紀一箭定江山，以1比0擊敗福岡黃蜂，呢波二連捷確係及時雨，總算走出早前3場不勝困局，有助眾將重拾信心。而且三箭一向都係砂岩剋星，雙方近4次正面交鋒，三箭取得3勝1和，其中3次上半場已取得領先優勢，明顯擅於先發制人，半場客勝捧得過。文:法達斯維