另一場歐聯16強賽事同時展開，葡超勁旅波圖主場迎戰阿仙奴。「兵工廠」闊別6季後再戰歐聯表現唔錯，不過一眾年輕球員缺乏淘汰賽經驗，面對歐聯常客波圖難免輸蝕，預料阿仙奴今場會以穩為先，希望保住不敗等次回合返主場搏殺，今仗可直取「和」局。（Now 644周四凌晨4時直播）

阿仙奴雖然喺分組賽4勝1和1負首名出線，但3仗作客只得1勝1和1負，主客場演出差異巨大。
泰尼米打柴波圖焗守

阿仙奴今季成績極佳，全賴球隊防守夠穩健，由威廉沙列巴同加比爾馬加希斯組成嘅中堅防線非常可靠，相信今場作客會先鞏固好防務，而且「兵工廠」近年造訪葡萄牙，向來都會以

「和」為貴，近5次作客葡超球隊當中，就有4次打和。
另邊廂，波圖上屆喺16強早早出局，但今屆分組賽壓倒薩克達以次名出線，不過球隊近期狀態下滑，喺葡超僅排喺第3位嘅被動位置，落後榜首足足7分。今仗仲喺賽前傳出伊朗前鋒泰尼米受傷消息，縱使有主場之利，亦難言爭勝，既然今場兩隊勢均力敵，不如直接博和波。