兩支於歐聯分組賽表現出色嘅「邊線球隊」，抽中喺16強碰頭，燕豪芬今晚先於主場鬥多蒙特。燕豪芬相隔8年再入淘汰賽，為更進一步肯定步步為營。多蒙特以穩健防守應付歐洲強敵，連同上屆在內，近11場歐聯賽事，8次半場同對手不分勝負，再追半場和。（Now 644周三凌晨4時直播）

「蜜蜂兵團」防守夠穩健
燕豪芬喺荷甲大超班，今季更保持22戰不敗，但近年歐聯成績麻麻，由於荷甲除咗冠軍之外，其餘球隊要喺外圍賽打起，ＰＳＶ對上兩屆都係附加賽出局，對上一次打入16強，已經係2016年嘅事。ＰＳＶ今屆分組賽只得2勝3和1負，壓過朗斯及西維爾以次名出線，但同榜首阿仙奴有4分距離，肯定唔屬歐洲一線勁旅。佢哋籤運唔曳，避過皇馬、曼城及拜仁等熱門，對住多蒙特晉級機會相對高啲，不過佢哋分組賽主場亦只得1勝2和，未必咬得入多蒙特。

多蒙特歐聯經驗豐富，今屆更於「死亡F組」壓過巴黎聖日耳門、A米及紐卡素脫穎而出，靠嘅就係穩健防守。連同上屆在內，「蜜蜂兵團」近11場歐聯賽事，8次開半和。施巴斯坦賀拿踢完非國盃後受傷，今場肯定倦勤，估計鋒線上會「以荷制荷」，以倒戈嘅當耶爾馬倫夥拍富克洛攻堅，不過兩人要靠供應先有得發圍，燕豪芬中場硬淨，比賽初段唔會畀對手太多機會，今場開出半場和機會高。