新正頭德甲榜首大戰，榜首利華古遜主場硬撼2哥拜仁慕尼黑。利華今季順風順水，信心爆晒棚撞正拜仁傷兵滿營，必定趁機贏呢場「6分波」，平手盤抵玩到極，新年捧利華開個靚頭。（Now 639周日凌晨1時30分直播）

利華喺主帥沙比阿朗素帶領下脫胎換骨，上季由降班邊緣爬到搶到歐霸入場券，今季更加犀利，20輪聯賽獲16勝4和未輸過，累積52分亦係德甲史上第3好嘅同期戰績，單計近6場聯賽贏5場，周中德盃8強亦反勝史特加3比2，旺勢停不了。

拜仁贏得太多欠飢渴感
拜仁之前11季稱霸德甲冠軍，贏得太多難免冇乜飢渴感，現時落後利華兩分，佢哋近7場聯賽雖然6勝1負，但好多時都係靠哈利卡尼等球星個人質素贏波，包括早前險勝奧格斯堡同柏林聯一粒，主帥杜曹始終未能令球隊再升呢，今場更有門將兼隊長紐亞、艾方素戴維斯、京士利高文及基拿比等傷兵缺陣，平手盤一於撐利華，新正頭搶頭彩。